Të dielën do të ripërsëriten zgjedhjet në 18 komuna të Kosovës ku asnjë nga kandidatët nuk arriti të marrë, më 12 tetor, mbi 50 përqind të votave.
Në raundin e parë, vetëm në 20 nga 38 komuna arritën të nxjerrin me një votë të qartë popullore të zgjedhurit e rinj vendor.
Balotazhi i ditës së nesërme në Kosovë konsiderohet edhe si një test se për ku shkon mbështetja popullore për forcat kryesore politike, çka do të jetë përcaktuese edhe për pushtetin qendror, përveç atij lokal.
Garë më e fortë politike më 9 nëntor, dhe që pritet me interes të madh, është ajo për kryeqytetin, ku për komunën e Prishtinës përballë njëri-tjetrit janë kryetari aktual i LDK-së, Përparim Rama, dhe rivali i tij i Vetëvendosjes, Hajrulla Çeku, të cilët patën vetëm 0.5% diferencë mes njëri-tjetrit në favor të Ramës.
Një tjetër përballje që pritet me interes është dhe Prizreni, ku përballë njëri-tjetrit janë Shaqir Totaj i Partisë Demokratike të Kosovës (PDK) dhe Artan Abrashi nga LVV-ja.
Mes këtyre dy forcave pritet një tjetër garë e rëndësishme në Mitrovicën e Jugut: Faton Peci i LVV-së dhe Arian Tahiri i PDK-së.
LVV-ja garon në balotazh në 12 komuna – në dy prej tyre si e para, në dhjetë si e dyta.
Në zgjedhjet e vitit 2021, kjo parti kishte fituar vetëm në katër komuna.
PDK-ja dhe LDK-ja, nga ana tjetër, janë përqendruar në mbajtjen e komunave që i konsiderojnë bastione tradicionale.