Një rast i mashtrimit kompjuterik është zbuluar dhe goditur nga policia. Autoritetet kanë vënë në pranga autorin kryesor të rastit dhe proceduan dy persona të tjerë.
“Drejtoria e Hetimit të Krimit Kibernetik në Departamentin e Policisë Kriminale, në bashkëpunim me Drejtorinë e Forcës së Posaçme Operacionale dhe në koordinimin e Prokurorisë pranë Gjykatës së Juridiksionit të Përgjithshëm Tiranë, zhvilloi dhe finalizoi operacionin policor të koduar “Smart Bank Phishing”. Në kuadër të operacionit u bë i mundur identifikimi dhe arrestimi i shtetasit O. Gj., 21 vjeç, banues në Laç, si dhe u proceduan penalisht, në gjendje të lirë, shtetasit D. G., 23 vjeç dhe E. Gj., 21 vjeç”, njoftoi policia.
21-vjeçari kishte krijuar një profil të rremë në rrjetet sociale duke përdorur logon dhe emrin e një banke në Shqipëri me qëllim mashtrimin e qytetarëve.
Ai kontaktonte qytetarët përmes platformave të ndryshme online duke iu ofruar kredi të rreme pranë bankës ndërsa nëpërmjet aksesit të paautorizuar në llogaritë e tyre arrinte t’u boshatiste fondet.
Në rastet kur llogaritë nuk kishin para, ai i shtynte qytetarët të depozitonin shuma nga 750 deri në 1 mijë e 500 euro, me premtimin e rremë të një kredie prej 15 mijë eurosh.
Policia vijon hetimet për zbardhjen e plotë të skemës dhe identifikimin e bashkëpunëtorëve të tjerë të mundshëm.