Policia e Shtetit ka bërë me dije se në vijim të operacionit policor të koduar “Kufizimi” janë arrestuar dy shtetase të shpallura më herët në kërkim. Operacioni, i zhvilluar nga strukturat e hetimit të krimeve të rënda në bashkëpunim me Forcën e Posaçme Operacionale, ka çuar në goditjen e një grupi personash të dyshuar për rrëmbim dhe dhunë ndaj një 27-vjeçari, me qëllim përfitimin e parave.
Njoftimi i policisë:
Vihen në pranga 2 shtetase të shpallura në kërkim 3 ditë më parë, në kuadër të këtij operacioni.
Në vijim të operacionit policor të koduar “Kufizimi”, i zhvilluar 3 ditë më parë nga Sektori për Hetimin e Krimeve të Rënda, në bashkëpunim me Forcën e Posaçme Operacionale, si rezultat i të cilit u vunë në pranga 3 shtetas, janë kryer kontrolle për kapjen e shtetasve të shpallur në kërkim.
Si rezultat, u vunë në pranga shtetaset M. M., 21 vjeçe dhe S. C., 25 vjeçe.
Nga hetimet dyshohet se këto 2 shtetase, 2 shtetasit e arrestuar gjatë operacionit dhe shtetasi në kërkim K. N., kanë bashkëpunuar me njëri-tjetrin, për t’i marrë para, 27-vjeçarit, duke i hequr lirinë, për disa orë, dhe duke e dhunuar fizikisht atë, në ambientet e një apartamenti.
Punohet për kapjen e shtetasit K. N.
Materialet proceduriale do t’i kalojnë Prokurosisë, për veprime të mëtejshme.