Partia Demokratike ka kërkuar shpalljen e gjendjes së jashtëzakonshme pasi shirat e dendur shkaktuan përmbytje të disa tokave bujqësore dhe bizneseve në zona të ndryshme të vendit.
Deputeti i PD, njëherësh nënkryetari i Komisionit të Ekonomisë, Eno Bozdo deklaroi se reshjet nuk ishin të papërballueshme, por sipas tij, problemi qëndron në infrastrukturën kulluese që nuk investohet dh nuk pastrohet prej vitesh.
“Përmbytjet tregojnë qartë se fermerët nuk kanë faj, reshjet nuk janë të papërballueshme, por kanalizimet nuk funksionojnë. Fermerët e Beratit dhe në bashkitë e tjera të qarkut sot gjenden në mëshirë të fatit. Jo se shiu ishte i papërballueshëm, por sepse pushteti vendor dhe qendror e kanë lënë infrastrukturën kulluese në mëshirë të fatit, pa e pastruar, pa investime dhe pa e përmbajtur.
Këtë papërgjegjshmëri e paguajnë shtrenjtë fermerët, ata nuk marrin mbështetje për prodhimin e tyre dhe kur përmbytet i lënë në mëshirë të fatit. Në këtë qeverisje, fermeri është i përbuzur dhe lihet mënjanë si qytetari më i parëndësishëm”, tha Bozdo.
Bozdo kërkoi që ministria e Bujqësisë dhe pushtetarët vendorë të verifikojnë dëmet, ndërsa ministri i Financave duhet të alokojë fonde për dëmshpërblimin 100% të çdo dëmi të shkaktuar nga përmbytjet. Ai theksoi se shpallja e gjendjes së jashtëzakonshme është e domosdoshme
“Në dy bashki ku dëmet janë më të mëdha, atë të Dimalit dhe të Kuçovës, rezulton se prej shumë vitesh nuk është investuar asnjë lek. Për këtë arsye, i kërkojmë ministrit të Bujqësisë dhe pushtetarëve vendor të verifikojnë sa më parë dëmet e shkaktuara për fermerët dhe bizneset, jo vetëm në Berat, por në gjithë Shqipërinë.
Gjithashtu i kërkojmë ministrit të Financave të alokojë fondin për dëmshpërblimin 100% të çdo dëmi të shkaktuar. Paratë janë dhe duhet të përdoren për të mbështetur fermerët. Për këtë arsye, është e nevojshme që qeveria të shpallë gjendjen e jashtëzakonshme, sepse është detyrë e saj të përgjigjet për këto dëme, mungon vetëm vullneti”, tha ai.