Doloreza Musabelliu është një tjetër kandidate për kreun e SPAK-ut. Para anëtarëve të KLP-së ajo renditi disa prej hetimeve kryesore të saj. Ato kishin të bënin me fushën e narkotikëve, trafikimin e qenieve njerëzore, vrasjeve, por edhe ato të funksionarëve të drejtësisë.
Musabelliu renditi tre raste (dy në vitin 2016 dhe një në vitin 2019) ku falë hetimeve janë dënuar dy ish-gjyqtarë de një ish-prokuror.
“Hetimi i çështjeve penale që përfshijnë funksionarë të sistemit të drejtësisë tregon një besueshmëri profesionale, dëshmon për menaxhimin e çështjeve të ndjeshme dhe angazhim të palëkundur ndaj parimit të barazisë para ligjit. Dëshmon balancën, vendosmërinë në hetim dhe mbi ndjeshmërinë që kërkon trajtimi i rasteve të tilla që prekin vetë sistemin e drejtësisë. Këto çështje reflektojnë bindjen profesionale se asnjë funksionar publik pavarësisht detyrës apo statusit nuk qëndron mbi ligjin dhe se zbatimi i barabartë i ligjit është themeli mbi të cilin ndërtohet procesi i rregullt ligjor dhe shteti i së drejtës”, tha ajo.