Reshjet e dendura të orëve të fundit kanë vënë në vështirësi qytetin e Durrësit, duke përmbytur një sërë rrugësh kryesore dhe duke detyruar autoritetet arsimore të pezullojnë procesin mësimor në të gjitha institucionet arsimore.
Sipas burimeve zyrtare nga ZVA Durrës, është marrë vendimi që mësimi të mos zhvillohet në shkollat publike dhe jopublike, si dhe në universitet, deri në normalizimin e situatës. Njoftimi u është përcjellë të gjitha institucioneve për të shmangur lëvizjet dhe rreziqet për nxënësit e studentët.
Përmbytje të shumta janë regjistruar në zona të ndryshme të qytetit, ku uji ka bllokuar qarkullimin e këmbësorëve dhe mjeteve. Veçanërisht problematike paraqitet situata pranë stadiumit dhe në zonën e Vollgës, ku rrugët janë bërë të pakalueshme për shkak të nivelit të lartë të ujit.
Në disa lagje, uji ka hyrë në hyrjet e pallateve dhe në biznese pranë rrugëve kryesore, duke shkaktuar dëme materiale dhe shqetësim te banorët. Vështirësi janë evidentuar edhe në ambientet e Universitetit “Aleksandër Moisiu” në Spitallë, ku situata mbetet problematike.