Vijojnë kërkimet për gjetjen e 30-vjeçarit Jurgen Karaj, i cili dyshohet se është marrë nga rrjedha e një përroi pas një aksidenti automobilistik në fshatin Dars, bashkia Klos.
Në operacionin e kërkimit janë angazhuar familjarë të të riut, banorë të zonës, forca policie, zjarrfikëse nga bashkitë Mat dhe Klos, si edhe efektivë të Forcave të Armatosura, në bashkëpunim me strukturat vendore. Kërkimet janë përqendruar përgjatë shtratit të lumit Mat, nga fshati Dars deri në Liqenin e Ulzës, ku derdhet lumi.
Ngjarja
Sipas policisë, një mjet tip “Audi” me targa angleze ka dalë nga rruga dhe ka përfunduar në përroin e fshatit Dars. Drejtuesi i mjetit ka qenë shtetasi A. L., 24 vjeç, banues në fshatin Fullqet, Klos, i cili dyshohet se po drejtonte automjetin në gjendje të dehur.
Pas aksidentit, 24-vjeçari dyshohet se është larguar nga vendngjarja pa i ardhur në ndihmë 30-vjeçarit Jurgen Karaj, i cili sipas policisë ndodhej në automjet në momentin e ngjarjes.
Trupi i 30-vjeçarit ende nuk është gjetur, ndërsa dyshohet se ai është marrë nga rrjedha e fortë e përroit.