SPAK ka mbyllur hetimet dhe ka nisur komunikimin e akuzave zyrtare për çështjen e trafikut të kokainës nga Amerika Latine drejt Shqipërisë, duke përdorur lëkurën e gjedhëve.
Sipas hetimeve, ndarja e kokainës u bë në një laborator në zonën e Qerekës, në Krujë.
Mësohet se SPAK ka pasur informacion mbi lëvizjet e grupit, por i ka lejuar ata të veprojnë në dy ngarkesat e fundit, konkretisht në shtator dhe në nëntor 2025, për të sjellë 48 ton lëkurë gjedhi, brenda të cilave dyshohet se ishte fshehur kokaina.
Gjatë kontrolleve në laboratorin e Qerekës u gjetën 850 lëkurë të kriposura bagëtish. Për ndarjen e drogës nga lëkura do të vinin shtetas të huaj, të specializuar për këtë pjesë të operacionit.
SPAK firmosi më herët 10 urdhër-arreste, përfshirë një venezuelian dhe dy kolumbianë.
Hetuesit kanë analizuar edhe mënyrën se si kanë hyrë në vendin tonë pajisjet për ndarjen e drogës të cilat kanë një kosto shumë të madhe pasi janë të teknologjisë së fundit. Lëkura e gjedhëve vinte nga Brazili dhe vendet e tjera të Amerikës Latine.
Kujtojmë se hetimet nisën që prej vitit 2023, nga ana e autoriteteve spanjolle, pas bllokimit të një sasie droge në Spanjë.