Një grup prej tetë kompanish franceze që operojnë në sektorin hekurudhor vizituan sot Shqipërinë, për të diskutuar mundësitë e investimeve në infrastrukturën hekurudhore të vendit.
Në takim ishte e pranishme edhe ambasadorja e Francës në Shqipëri, Catherine Suard, e cila theksoi marrëdhëniet shumë të mira dypalëshe dhe potencialin për bashkëpunim të mëtejshëm në infrastrukturën hekurudhore.
Zëvendësministrja e Infrastrukturës dhe Energjisë, Edona Bilali nënvizoi ekspertizën franceze në këtë sektor dhe gatishmërinë për të thelluar bashkëpunimin dhe shkëmbimin e praktikave më të mira.
Gjatë një seminari të organizuar nga AIDA, pjesëmarrësit theksuan mundësitë për bashkëpunim dhe shkëmbimin e eksperiencave mes Shqipërisë dhe Francës, si dhe projektet kryesore hekurudhore në zhvillim, si linja Tiranë-Durrës dhe korridori Adriatiko-Jonian.
Në seminar u diskutuan mundësitë edhe për forcimin e partneriteteve dhe avancimin e projekteve rajonale, përfshirë bashkëpunimin me Malin e Zi dhe Kosovën.
Shqipëria po kërkon të rrisë investimet dhe të modernizojë sektorin e transportit hekurudhor, me fokus në projekte që do të përmirësojnë lidhjet rajonale dhe infrastrukturën brenda vendit.