Ministrja e Brendshme, Albana Koçiu, ka reaguar lidhur me dhunën në protestën e sotme të thirrur nga kryedemokrati Sali Berisha.
Përmes një postimi në rrjetet sociale, Koçiu shprehet se sot e drejta për të protestuar u dhunua nga një grup që zgjodhi forcën në vend të fjalës, duke sulmuar efektivët e Policisë.
Teksa u shprehu mirënjohjen efektivëve të Policisë, Koçiu shtoi se dhuna nuk mund të jetë kurrë një mjet për zgjidhjen e problemeve.
Reagim i ministres së Punëve të Brendshme, Albana Koçiu në rrjetet sociale:
E drejta për të protestuar, për të disatën herë, u dhunua nga një grup që zgjodhi forcën në vend të fjalës, duke sulmuar, dhunuar e lënduar punonjësit e Policisë së Shteti.
Dhuna nuk mund të jetë kurrë një mjet dhe asnjë lloj agjende nuk e justifikon përdorimin e saj.
Mirënjohje për çdo punonjës policie që tregoi profesionalizëm dhe maturi përballë çdo provokimi.
Policia do të jetë gjithmonë në krye të detyrës për të garantuar të drejtën për të protestuar, si dhe të garantojë sigurinë e çdo qytetari dhe të pronës publike dhe të qytetarëve.