Dita e nesërme shënon 18 vjetorin e Pavarësisë së Kosovës, e me këtë rast kryeministri Edi Rama do të udhëtojë këtë të hënë drejt Prishtinës për një vizitë zyrtare. Policia e Kosovës ka lajmëruar masat që do të merren gjatë parakalimit të eskortës së kryeministrit Rama.
“Për të mundësuar qarkullim të lirë të eskortës sipas itinerarit të lëvizjes nga pika kufitare Aeroporti si dhe zhvillimin e aktiviteteve sipas agjendës zyrtare së vizitës, Policia e Kosovës do të bëjë ndërprerje të përkohshme të qarkullimit të trafikut (në intervale të shkurtra kohore) të disa segmenteve rrugore (ku pritet të kalojë eskorta), ku edhe mund të ketë riorientim të trafikut në rrugë alternative. Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik”, thuhet në njoftimin zyrtar.
Ende nuk dihet nëse Kryeministri do të marrë pjeesë në marshimin e organizuar për ish-krerët e UÇK-së.
Dita e Pavarësisë së Kosovës festohet çdo vit më 17 shkurt. Ajo shënon shpalljen e pavarësisë nga Serbia në vitin 2008, duke e bërë Kosovën shtetin më të ri në Evropë. Kryeministri i atëhershëm Hashim Thaçi lexoi Deklaratën e Pavarësisë në Kuvendin e Kosovës.
Kosova njihet si shtet sovran nga 117 vende, përfshirë Shtetet e Bashkuara dhe shumicën e vendeve të Bashkimit Evropian.
Përveç agjendës zyrtare, platforma qytetare “Liria ka Emër” ka njoftuar organizimin e një marshimi masiv, nën emrin “Drejtësi jo politikë”, i cili pritet të nisë pasdite në Prishtinë.