Qeveria spanjolle i është përgjigjur presidentit amerikan Donald Trump, i cili deklaroi se do të ndërpresë çdo marrëdhënie tregtare me Spanjën, pasi vendi evropian refuzoi t’i lejonte ushtrisë amerikane të përdorte bazat e tij për misione që lidhen me sulme ndaj Iranit.
Sipas gazetës El País, qeveria spanjolle theksoi se vendi është anëtar kyç i NATO-s dhe fuqi eksportuese e Bashkimit Evropian.
“Spanja respekton angazhimet e saj, është një partner tregtar i besueshëm për 195 vende në botë, përfshirë SHBA-të, me të cilat ruajmë një marrëdhënie historike dhe të ndërsjellë përfitueshme.
Nëse qeveria amerikane dëshiron ta rishikojë këtë marrëdhënie, duhet ta bëjë duke respektuar autonominë e bizneseve private, legjitimitetin ndërkombëtar dhe marrëveshjet dypalëshe midis Bashkimit Evropian dhe SHBA-së,” thuhet në deklaratën e shpërndarë nga zyra e kryeministrit.
“Spanja ka vepruar në mënyrë të papranueshme,” tha më herët Donald Trump për gazetarët, duke shtuar se kishte kërkuar nga sekretari i Thesarit Scott Bessent që të ndërpriste çdo transaksion me vendin.
“Ne do të ndërpresim çdo marrëdhënie tregtare me Spanjën. Nuk duam të kemi asnjë lidhje,” shtoi ai.
Trump gjithashtu u ankua se Spanja nuk kishte pranuar të rrisë shpenzimet e mbrojtjes në 5% të Prodhimit të Brendshëm Bruto, siç kërkoi ai nga aleatët e NATO-s.