Dhjetë ditët e para të luftës i kanë kushtuar taksapaguesve evropianë rreth 3 miliardë euro shtesë vetëm për importet e lëndëve djegëse. Shifrat u bënë publike nga shefja e Komisionit Evropian, Ursula Von der Leyen e cila theksoi se varësia nga burimet e jashtme po rëndon ekonomitë e vendeve anëtare.
Ajo theksoi se Evropa do të bënte një gabim strategjik nëse do të përpiqej të zbuste çmimet në rritje të energjisë me një rikthim te lëndët djegëse fosile ruse.
“Që nga fillimi i këtij konflikti, çmimet e gazit janë rritur me 50% dhe ato të naftës me 27%. Nëse e përkthejmë këtë në euro, 10 ditë luftë u kanë kushtuar taksapaguesve evropianë 3 miliardë euro shtesë në importet e lëndëve djegëse fosile. Ky është çmimi i varësisë sonë”.
Përballë kësaj situate, Von der Leyen u kërkoi vendeve anëtare të mos dorëzohen përpara strategjisë afatgjatë për energjinë e rinovueshme.
“Fakti është se ne kemi burime energjie vendase, ato të rinovueshme dhe bërthamore. Çmimet e tyre kanë mbetur të njëjta. Disa argumentojnë se duhet të braktisim strategjinë tonë dhe të kthehemi te lëndët fosile ruse. Ky do të ishte një gabim strategjik. Do të na bënte më të varur, më të prekshëm dhe më të dobët”.
Paralelisht me lëvizjet e BE-së, Agjencia Ndërkombëtare e Energjisë po diskuton një propozim për hedhjen në treg të miliona fuçive naftë nga rezervat strategjike, një volum që pritet të tejkalojë edhe ndërhyrjen e vitit 2022.
Edhe ministrat e energjisë të vendeve të G7-ës kanë dhënë mbështetjen e tyre në parim për këtë nismë, me qëllim frenimin e çmimeve të papërpunuara në tregjet botërore.