Prej disa ditësh, ekipet e emergjencave civile në Bashkinë e Dibrës po përballen me një situatë shqetësuese të përhapjes së zjarreve, kryesisht në sipërfaqe pyjore, kullota dhe parcela bujqësore.
Vatra aktive zjarri janë evidentuar në fshatin Nezhaj, në Njësinë Administrative Zallë-Dardhë, si dhe në zonën e Shumbatit, në Njësinë Administrative Sllovë. Në terren janë angazhuar zjarrfikës, punonjës të bashkisë, efektivë të policisë dhe banorë të zonës, të cilët po punojnë intensivisht për neutralizimin e flakëve.
Përhapja e zjarreve në disa zona njëkohësisht ka rritur ndjeshëm shqetësimin e autoriteteve vendore. Kryebashkiaku Rahim Spahiu ka bërë një apel të fortë për rritjen e vigjilencës:
“Duke marrë shkas nga numri i lartë i zjarreve në zona të ndryshme të Dibrës, u bëj thirrje të gjitha njësive administrative, kryepleqve, vullnetarëve, strukturave të emergjencave dhe Policisë së Shtetit të rrisin gatishmërinë. Po përballemi me dëme të konsiderueshme, ndërkohë që ende nuk ka nisur sezoni i verës.”
Autoritetet bëjnë thirrje për kujdes maksimal nga qytetarët dhe bashkëpunim të plotë për parandalimin e përhapjes së mëtejshme të zjarreve.
