Gjatë një operacioni në Tiranë kundër lojërave të paligjshëm të fatit janë zbuluar 4 raste, ndërsa kanë çuar në pranga disa persona.
Në rastet e zbuluara, autorët kishin përshtatur lokalet dhe ambientet e tjera për zhvillimin e lojërave të fatit. Gjatë operacionit të koduar “Fati i Lojërave”, u vunë në pranga 5 shtetas dhe u shpallen në kërkim 2 të tjerë.
Konkretisht u arrestua shtetasi Xh. K., 34 vjeç, pasi në lokalin e tij u gjetën 5 njësi kompjuterike, me të cilat zhvilloheshin lojëra fati. Gjithashtu u arrestuan shtetasit K. Ç., 47 vjeç dhe R. M., 42 vjeç, pasi në lokalin në pronësi të 47-vjeçarit, ku ishte i punësuar shtetasi R. M., u gjetën 4 njësi kompjuterike që përdoreshin për lojëra fati.
Në pranga ranë edhe shtetasi E. N., 49 vjeç, si dhe u shpall në kërkim shtetasi L. B., 32 vjeç, pasi në një ambient në administrim të 32-vjeçarit, me punonjës shtetasin E. N., u gjetën 7 njësi kompjuterike që përdoreshin për lojëra fati;
U arrestua edhe shtetasi K. V., 22 vjeç, si dhe u shpall në kërkim shtetasi F. V., 60 vjeç, pasi në një ambient në pronësi të këtij të fundit u gjetën tavolina pokeri dhe sende të tjera që dyshohet se shërbenin për organizimin e lojërave të fatit. 22-vjeçari u kap në flagrancë duke tentuar të prishë provat materiale.
Materialet procedurale iu referuan Prokurorisë, për veprime të mëtejshme.