Ministri për Evropën dhe Punët e Jashtme, Ferit Hoxha, ka publikuar në rrjetin social X se çfarë u diskutua në Forumin Ekonomik të Delphit për zgjerimin e BE-së.
Hoxha nënvizon se zgjerimi sot zë një rol qendror në agjendën e Bashkimit Evropian dhe ka rëndësi strategjike.
Ministri shton se Deklarata e Delphit e 22 prillit duhet të ndihmojë në kthimin e këtij premtimi në realitet. Ministri përmend përshpejtimin e negociatave për disa vende kandidate, përfshirë Shqipërinë.
Sipas tij, këto zhvillime tregojnë se Bashkimi Evropian po shkon drejt pranimit të anëtarëve të rinj deri në vitin 2030, ndërsa Shqipëria mbetet e angazhuar plotësisht për këtë proces.
Ministri për Evropën dhe Punët e Jashtme, Ferit Hoxha, postim në X:
Deklarata e #Selanikut bëri një premtim dhe krijoi shpresë. Më shumë se dy dekada më vonë, ky premtim ende nuk është jetësuar plotësisht, por nuk ka qenë i kotë. Roli qendror që #zgjerimi zë sot në agjendën e #BashkimitEuropian është një dëshmi e qartë e rëndësisë së tij të qëndrueshme dhe strategjike.
Deklarata e #Delphit e 22 prillit 2026 duhet tani të ndihmojë në kthimin e këtij premtimi në realitet. Ritmi i përshpejtuar i negociatave për disa vende kandidate, përfshirë #Shqipërinë, së bashku me angazhimin e ripërtërirë politik në të gjithë BE-në, janë tregues të fortë se Bashkimi Evropian po shkon drejt pranimit të anëtarëve të rinj deri në vitin 2030.
#Shqipëria mbetet plotësisht dhe vendosmërisht e angazhuar për të qenë pjesë e këtij ndryshimi historik.