Gjithnjë e më shumë turistë vendas dhe të huaj po zgjedhin Drinin e Zi për të ushtruar sportet ujore.
Sporti i rafting i është bashkëngjitur tashmë ofertave të tjera turistike që ofrohen në Dibër si një potencial më shumë për turistët dhe të apasionuarit pas sporteve të aventurës.
Kryeministri Edi Rama ndau sot momente nga energjia e aventurës në Drinin e Zi me fillimin e sezonit të rafting në Dibër.
Rama e cilësoi këtë eksperiencë si një aventurë që ndërthur natyrën e egër, adrenalinën dhe bukurinë e paprekur të zonës.
Drini i Zi bashkë me luginën e tij piktoreske ofron mundësi mjaft të mira për rafting, duke i hapur rrugë zhvillimit të turizmit të aventurës në një destinacion të ri turistik.
Lumi buron nga Liqeni i Ohrit, nga një lartësi mbidetare prej 695 m, ndërsa del nga territori i Maqedonisë në afërsi të qytetit të Dibrës në lartësi mbidetare 476 m. Gjatësia e përgjithshme e lumit është 149 km, dhe brenda Maqedonisë lumi është i gjatë 56 km.
Drini i Zi rrjedh në veri në drejtim të qytetit të Dibrës në një zonë malore, ku pastaj e shënon një pjesë të kufirit të Maqedonia e Veriut – Shqipëri, për të kaluar pastaj në territorin e Shqipërisë.
Pranë qytetit të Kukësit, Drini i Zi bashkohet me Drinin e Bardhë duke formuar lumin e bashkuar Drini që ka derdhje në Detin Adriatik.