Volumet totale të energjisë elektrike të tregtuara në tregjet e ALPEX gjatë muajit mars 2026 arritën 174,315.71 MWh, ndërsa rrjedha ndërkufitare ishte 56,622.97 MWh.
Sipas raportit të ALPEX-it, të ardhurat totale të faturuara për këtë periudhë llogariten 15,822,686.61 euro për Zonën e Ofertimit të Shqipërisë dhe 20,360,137.31 euro për Zonën e Ofertimit të Kosovës, duke arritur një vlerë të përbashkët prej 36,182,823.92 euro.
Në Tregun e Ditës në Avancë të ALPEX-it, gjatë muajit mars 2026, është tregtuar një volum prej 165,316.69 MWh energji elektrike, me një çmim mesatar klerues prej 96.89 €/MWh.
Rrjedhat ndërkufitare në këtë treg janë regjistruar në 50,612.53 MWh, ku 47,398.74 MWh kanë kaluar nga Zona e Ofertimit e Shqipërisë drejt Zonës së Ofertimit të Kosovës, ndërsa 3,213.79 MWh nga Kosova drejt Shqipërisë.
Për këtë segment tregu, janë faturuar gjithsej 15,099,202.61 euro për Shqipërinë dhe 19,070,578.73 euro për Kosovën, me një total prej 34,169,781.34 euro.
Gjatë marsit, në tregjet e ALPEX-it morën pjesë 43 anëtarë të bursës në Tregun e Ditës në Avancë, prej të cilëve 30 anëtarë ishin aktivë edhe në Tregun e Ankandeve Brenda të Njëjtës Ditë. Numri i anëtarëve të përgjithshëm të klerimit ka arritur në 6.
ALPEX njoftoi gjithashtu se gjatë muajit mars 2026 ka mirëpritur një anëtar të ri në Tregun e Ditës në Avancë, “NAD Investment Sh.p.k”, për Zonën e Ofertimit të Shqipërisë.