Në afërsi të autostradës Tiranë-Durrës shumë shpejt pritet të nisë puna për montimin e stadiumit më të ri të përkohshëm Eagle Stadium apo Stadiumi Shqiponja, ku në 11 korrik do të mbajë koncertin e tij këngëtar i njohur Kenny West. Zona e zgjedhur ka një sipërfaqe prej disa dhjetra mijë metra katrorë, dhe është në hyrje të Tiranës, buzë rrugës dytësore, vetëm 2 kilometra nga qendra e kryeqytetit.
“Në qendër të stadiumit pritet të ngrihet një glob i madh gjigant që përkon me simbolikën që këngëtari i njohur përdor në turet e tij botërore. Ndërkohë që stadiumi pritet të akomodojë 60.000 spektatorë, ndërsa tani janë shitur rreth 20.000 bileta.”
Çmimet e biletave fillojnë nga 120 euro, ndërkohë për vendet VIP ato arrijnë deri në 339 euro.
“Ne kemi mësuar që gjatë ditës së koncertit transporti i spektatorëve do të bëhet në mënyrë të organizuar përmes automjeteve dhe autobusëve të vëna në dispozicion nga organizatorët, ndërsa një pjesë e autostradës do të jetë e bllokuar.”
Siç mësohet, për lëvizjet e mjeteve që do të bëjnë transportin e spektatorëve, do të lihen korsi të dedikuara. Stadiumi do të qëndrojë për disa javë dhe do të shihet mundësia për të organizuar edhe aktivitete të tjera.
Koncerti i Kanye West në Tiranë është pjesë e turit botëror të artistit për vitin 2026, që nis në SHBA dhe më pas vijon në Azi dhe Europë. Koncerti organizohet nga “Streetlife”, një kompani me bazë në Berlin dhe që ka punuar me artistë, si: 50 Cent, Drake, Snoop Dogg, Kendrick Lamar, Nicki Minaj etj, ndërsa në Shqipëri, aktiviteti mbështetet nga Redcloud (Tirana) dhe Live Label (Hollandë). Mbështetje logjistike për koncertin ofron edhe Ministria e Kulturës.