Inteligjenca artificiale vjen tashmë dhe në telefonat superekonomik, dhe është kompania finlandeze Hmd që e sjell me markën historike Nokia. Në një event në Milano, ajo ka publikuar versionin e Nokia 2.2, një smartphone mjaft ekonomik.
“Në këto dy vite të para kemi pasur mjaft sukses dhe jemi shumë të besueshëm për të ardhmen. Nokia është marka e parë në botë për telefonët tradicionalë dhe hyri në top ten botëror të prodhuesve të smartphone”, ka thënë për ANSA-n, Per Ekman, shefi i shitjeve globale të Hmd.
Çelësi i suksesit është kujdesi ndaj konsumatorit. “Ne e bëjmë telefonin më të mirë gjatë gjithë jetëgjatësisë së tij pasi ofrojmë përditësime mujore të sigurisë për tre vite, dhe jemi të vetmit që e bëjmë këtë, garantojmë dy vite përditësime të sistemit operativ. Pasi është klienti ai që duhet të zgjedhë kur dëshiron të zëvendësojë telefonin, dhe jo telefoni të vendosë se kur duhet të ndërrohet pasi nis të funksionojë keq”, ka thënë Ekman.
Përditësimet, që janë pjesë e programit Android One të Google, janë të garantuara edhe tek Nokia 2.2. Ky smartphone përdor inteligjencën artificiale qoftë për të bërë foto në kushte me pak dritë, edhe në fotokamerën e përparme, për zhbllokimin e pajisjes me njohjen e fytyrës. Një tjetër veçori është tasti i dedikuar për asistentin zanor të Google.
Telefoni vjen me dy ngjyra, të çeliktë dhe të zezë tungsten, me një çmim nën 100 euro.