Presidenti i Republikës, Bajram Begaj, ndodhet në vizitë zyrtare në Uzbekistan, me ftesë të Presidentit Shavkat Mirziyoyev, ku u prit me ceremoni shtetërore në kryeqytetin Tashkent.
Kjo është hera e parë që një president shqiptar viziton zyrtarisht Uzbekistanin që prej vitit 1993, kur u vendosën marrëdhëniet diplomatike mes dy vendeve. Vizita vjen në një moment kur lidhjet dypalëshe kanë shënuar një dinamizëm të ri gjatë dy viteve të fundit.
Presidenti Begaj mori pjesë edhe në Forumin Ndërkombëtar të Investimeve 2026, një event me rëndësi të veçantë për nxitjen e bashkëpunimit ekonomik mes vendeve.
Gjatë takimit me homologun uzbek, Begaj shprehu bindjen se ka ardhur koha për të kaluar nga marrëdhënie formale miqësore në bashkëpunim konkret me rezultate të matshme. Dy palët diskutuan mundësi bashkëpunimi në fushat e politikës, ekonomisë, tregtisë, energjisë, bujqësisë, turizmit, dixhitalizimit, arsimit dhe kulturës.
Presidenti theksoi rëndësinë e kontakteve të drejtpërdrejta mes qytetarëve:
“Ne duhet të forcojmë miqësinë mes dy vendeve, të bëjmë qytetarët tanë të krijojnë marrëdhënie mes tyre, të bëjmë studentët tanë të zbulojnë kultura të tjera, të bëjmë profesionistët tanë të shkëmbejnë dijen e tyre, të bëjmë bizneset tona të krijojnë partneritete të suksesshme, qytetarët tanë të zbulojnë destinacione të reja dhe të njohin njëri-tjetrin nëpërmjet respektit të ndërsjellë.”
Në këtë kuadër, Begaj nënvizoi nevojën e hapjes së një lidhjeje ajrore direkte ndërmjet dy vendeve, ndërsa pala uzbeke premtoi hapjen e ambasadës së saj në Tiranë.
Presidenti e njoftoi gjithashtu homologun e tij mbi progresin e Shqipërisë drejt anëtarësimit në Bashkimin Europian, duke e cilësuar integrimin si qëllim strategjik dhe mision kombëtar.
“Për Shqipërinë”, tha Begaj, “ky është qëllim, objektiv strategjik dhe mision. Ne po punojmë fort për përmbushjen e reformave të nevojshme për arritjen e standardeve të anëtarësimit në çdo fushë. Ne jemi gati!