Trashëgimia kulturore shqiptare do të prezantohet para publikut britanik më 6 korrik përmes shfaqjes etno-muzikore teatrore “Albania Through Byron’s Eyes”, (Shqipëria përmes syve të Bajronit), një prodhim artistik që ndërthur historinë, poezinë dhe kujtesën kulturore në një dialog të veçantë skenik.
Vepra, me një kohëzgjatje prej 60 deri në 90 minutash, sjell Shqipërinë e fillimit të shekullit XIX përmes këndvështrimit poetik të Lord Byronit, duke e paraqitur vendin si një tokë të lirisë, dinjitetit, forcës dhe identitetit të thellë kombëtar.
E frymëzuar nga poema “Childe Harold’s Pilgrimage” (Kënga II), shfaqja zhvillohet si një udhëtim artistik në Shqipërinë e Byronit, ku poezia, muzika, vallja dhe memoria historike bashkohen në skenë. Në qendër të saj janë temat që poeti britanik vërejti dhe përjetësoi në veprën e tij: liria, nderi, mikpritja shqiptare dhe roli i gruas shqiptare si themel i familjes dhe identitetit kombëtar.
Organizatorët theksojnë se përshkrimi që Byroni i bëri shqiptarëve përfaqëson një nga dëshmitë më të veçanta të admirimit dhe respektit ndaj kulturës shqiptare në Evropën e shekullit XIX.
Shfaqja e organizuar nga Empoerd Women Of Diaspora dhe British Albanian Youth Culture me mbështetjen kryesore të Agjencisë Kombëtare të Diasporës, shënon gjithashtu një moment historik për diplomacinë kulturore shqiptare.
Për herë të parë që nga rënia e regjimit komunist, Ansambli Kombëtar i Këngëve dhe Valleve Popullore do të ngjitet në një skenë londineze, i shoqëruar nga Drejtori i Përgjithshëm i Teatrit Kombëtar të Operës, Baletit dhe Ansamblit Popullor (TKOBAP), Aulon Naçi.
Sipas organizatorëve, projekti tejkalon dimensionin e një shfaqjeje artistike, duke u konsideruar një ngjarje me rëndësi kulturore, institucionale dhe kombëtare për promovimin e trashëgimisë shqiptare në Mbretërinë e Bashkuar.
Përmes muzikës, poezisë, teatrit dhe rrëfimit kulturor, “Albania Through Byron’s Eyes” synon të krijojë një urë të fuqishme komunikimi mes kulturës shqiptare dhe publikut ndërkombëtar, duke sjellë në vëmendje vlerat dhe historinë e Shqipërisë në një format bashkëkohor artistik.