Kryeministri Edi Rama do të marrë pjesë në Konferencën për Rindërtimin e Ukrainës (Ukraine Recovery Conference – URC 2026), e cila zhvillohet më 25 dhe 26 qershor në Gdańsk të Polonisë, me pjesëmarrjen e liderëve shtetërorë, institucioneve financiare ndërkombëtare, përfaqësuesve të biznesit dhe organizatave të shoqërisë civile nga vende të ndryshme të botës.
Konferenca synon të forcojë mbështetjen ndërkombëtare për Ukrainën dhe të mobilizojë investime për rindërtimin dhe zhvillimin afatgjatë të vendit. Diskutimet do të përqendrohen në sektorët më të prekur nga lufta, si energjia, infrastruktura kritike dhe logjistika, si edhe në forcimin e kapaciteteve të sigurisë dhe mbrojtjes.
Gjatë vizitës në Poloni, Rama do të pritet nga kryeministri polak Donald Tusk dhe do të marrë pjesë në ceremoninë zyrtare të hapjes së konferencës. Më pas, ai do të mbajë një fjalë përshëndetëse në sesionin e dytë plenar të aktivitetit.
Në kuadër të agjendës së tij, kreu i qeverisë shqiptare do të zhvillojë takime dypalëshe me homologë të vendeve pjesëmarrëse, si dhe me Komisioneren e Bashkimit Europian për Zgjerimin, Marta Kos.
Po ashtu, Rama pritet të takohet edhe me drejtues të kompanive ndërkombëtare, përfshirë përfaqësues të sektorëve të energjisë dhe investimeve, me fokus zgjerimin e bashkëpunimit ekonomik dhe identifikimin e mundësive të reja për zhvillim.
Konferenca për Rindërtimin e Ukrainës konsiderohet platforma kryesore ndërkombëtare për koordinimin e mbështetjes politike, financiare dhe ekonomike ndaj Ukrainës, duke bashkuar aktorë publikë dhe privatë në funksion të rimëkëmbjes dhe transformimit afatgjatë të vendit.