Të zemëruar nga sulmet me dronët ukrainas dhe të zemëruar nga ajo që e shohin si një premtim të dështuar të SHBA-së për të ndërmjetësuar përfundimin e luftës me kushte të favorshme, mbështetësit e linjës së ashpër rusë po i kërkojnë Presidentit Vladimir Putin të braktisë diplomacinë dhe të përshkallëzojë situatën.
Thirrjet për masa më të ashpra nuk janë të reja. Zërat nacionalistë kanë këmbëngulur prej kohësh për mobilizim të plotë, shkatërrimin e zonws qeveritare të Kievit, vrasjen e Presidentit Volodymyr Zelenskiy dhe sulme ndaj fabrikave evropiane të dronëve. Disa mbështetës të linjës së ashpër madje i kanë bërë thirrje shefit të Kremlinit të marrë në konsideratë përdorimin e armëve bërthamore taktike.
Por sulmet e thella të Ukrainës këtë muaj – që synojnë Moskën, Shën Petersburgun dhe Krimenë, si dhe ato që Rusia i quajti dy sulme vdekjeprurëse ndaj autobusëve të pasagjerëve – i kanë mprehur dhe intensifikuar këto kërkesa.
Analistët thonë se retorika gjithnjë e më e ashpër pasqyron shqetësimin në rritje mbi shtrirjen dhe ndikimin e sulmeve me dronë ukrainasë, si dhe një debat më të gjerë se si Rusia – me territorin e saj të gjerë – mund të mbrohet ndërsa ende ndjek qëllimet e saj të luftës në një konflikt që e nisi në vitin 2022.
“Çfarë tjetër duhet të ndodhë para se të fillojmë të luftojmë vërtet? Lufta do të thotë fitore me çdo kusht. Ukrainasit janë në luftë, kështu që po luftojnë me gjithçka që kanë”, tha Konstantin Malofeyev, një manjat nacionalist, pasi një sulm ukrainas i vuri flakën një rafinerie nafte në Moskë javën e kaluar.
“Pse nuk po përdorim armë bërthamore, të cilat paraardhësit tanë i zhvilluan dhe i grumbulluan me të gjithë fuqinë e kombit pikërisht për këtë qëllim?” pyeti ai.
Disa komentues nacionalistë i kanë kërkuar Moskës të miratojë atë që ata e quajnë taktika efektive ushtarake dhe diplomatike të Iranit kundër Shteteve të Bashkuara. Blogu i Obsessed by War, me mbi 650,000 ndjekës, ka bërë thirrje për t’i bërë qytetet e mëdha ukrainase të pajetueshme përmes bombardimeve. Të tjerë thonë se është koha për të braktisur bisedimet e paqes të ndërmjetësuara nga SHBA-të dhe për të ndjekur shkatërrimin e plotë të shtetit ukrainas.