30 qershor 2026- Policia e Korçës ka zbardhur rrethanat e atentatit të ndodhur një ditë më parë në Pogradec, ku mbeti i plagosur me armë zjarri një 35-vjeçar.
Si rezultat i hetimeve janë identifikuar katër autorët e dyshuar të ngjarjes, të gjithë me precedentë penalë për krime kundër personit.
Në pranga kanë rënë N. A., 24 vjeç, banues në Buçimas, dhe D. P., 30 vjeç, banues në lagjen nr. 1 të Pogradecit. Ndërkohë, policia ka shpallur në kërkim M. B., 40 vjeç, banues në lagjen nr. 2 të Pogradecit, si dhe E. A., 22 vjeç, banues në Buçimas.
Sipas hetimeve të kryera rezultoi se katër të dyshuarit kanë tentuar të vrasin 35-vjeçarin B. S. për shkak të konflikteve të mëparshme.
Ngjarja ndodhi teksa 35-vjeçari ndodhej në automjetin e tij, të parkuar në lagjen nr. 3 të Pogradecit, ku u qëllua me armë zjarri dhe mbeti i plagosur në këmbë.
Policia thotë se njëri prej autorëve kryesorë u lokalizua dhe u arrestua vetëm pak minuta pas ngjarjes, falë reagimit të shpejtë dhe ndjekjes së pandërprerë nga efektivët.
Gjatë veprimeve hetimore u sekuestruan në cilësinë e provës materiale tre automjete dhe gjashtë telefona celularë, të cilët do t’i shërbejnë hetimit.
I plagosuri vijon të marrë ndihmë mjekësore dhe ndodhet nën kujdesin e mjekëve.
Të arrestuarit dhe të shpallurit në kërkim akuzohen për veprat penale “Vrasja me paramendim”, kryer në bashkëpunim, mbetur në tentativë, si dhe “Mbajtja pa leje dhe prodhimi i armëve, armëve shpërthyese dhe i municionit”.
Motivi kryesor
Autori i dyshuar (N.A.) u plagos vitin e kaluar nga (S.S.), vëllai i të plagosurit(B.S.) në një berbehane. Ngjarja ka ndodhur në janar të vitit 2025. Megjithatë do jenë hetimet e plota ato, që do të përcaktojnë rrethanat e kësaj ngjarjeje të rëndë.