Franca do të mbajë zgjedhjet e ardhshme presidenciale më 18 prill dhe 2 maj 2027. Vendimi është konfirmuar nga një burim qeveritar për AFP dhe pritet të zyrtarizohet në mbledhjen e kabinetit të së mërkurës.
Sipas të njëjtit burim, qeveria ka zgjedhur këtë kalendar, duke hequr dorë nga alternativa që parashikonte zhvillimin e zgjedhjeve më 11 dhe 25 prill 2027.
Kushtetuta franceze përcakton se zgjedhjet presidenciale duhet të zhvillohen 20 deri në 35 ditë përpara përfundimit të mandatit të presidentit në detyrë.
Presidenti Emmanuel Macron, i cili nisi mandatin e tij të dytë më 14 maj 2022, nuk mund të kandidojë për një mandat të tretë radhazi, në përputhje me kufizimet kushtetuese.
Raundi i parë i votimit do të zhvillohet gjatë pushimeve pranverore të shkollave, ndërsa raundi i dytë është planifikuar për më 2 maj 2027, një ditë pas festës së 1 Majit.