Kuvendi është rrethuar me barriera metalike këtë të enjte, ndërsa në zonën përreth janë marrë masa të shtuara sigurie për zhvillimin e seancës plenare.
Sipas burimeve, rreth 500 efektivë policie janë angazhuar pranë godinës së Parlamentit për garantimin e rendit dhe sigurisë.
Në gatishmëri janë vendosur edhe makinat ujëhedhëse, të cilat do të përdoren në rast të përshkallëzimit të situatës. Po ashtu, në dispozicion ndodhen edhe mjete të shërbimit zjarrfikës dhe ambulanca.
Ndërkohë, burime për gazetarin Muhamed Veliu bëjnë me dije se deputetët e Partisë Socialiste dhe të Partisë Demokratike kanë mbërritur më herët në ambientet e Kuvendit.
Në rendin e ditës të seancës plenare janë parashikuar dy interpelanca, një me ministrin e Turizmit dhe një me ministrin e Drejtësisë.