Një aksident i rëndë është regjistruar këtë paradite në aksin rrugor rural Pirrë–Kamçisht, në Bashkinë Lushnjë.
Sipas informacioneve, një automjet tip fuoristradë ka goditur nga pas një motoçikletë me të cilën udhëtonte 76-vjeçari Minella Prençe, banor i fshatit Pirrë.
Menjëherë në vendngjarje ka mbërritur ambulanca, e cila e ka transportuar me urgjencë të moshuarin drejt spitalit të Lushnjës. Ai ndodhet nën kujdesin e mjekëve në gjendje të rëndë shëndetësore.
Ndërkohë, policia e qarkullimit rrugor ka shoqëruar drejtuesin e fuoristradës, ndërsa grupi hetimor po punon për të zbardhur rrethanat dhe shkaqet e aksidentit.