Granit Pepnika është arrestuar në një resort në zonën e Dhërmiut, gjatë një operacioni të zhvilluar nga forcat operacionale dhe Policia e Vlorës.
Sipas burimeve, efektivët kishin siguruar më herët informacione operative mbi vendndodhjen e tij dhe e kishin mbajtur nën vëzhgim. Arrestimi u krye në momentin kur Pepnika po dilte nga resorti për t’u nisur drejt plazhit, pa i lënë mundësi të reagonte. Ai nuk ka bërë rezistencë gjatë ndërhyrjes së policisë.
Operacioni, i finalizuar nga strukturat operacionale të Policisë së Vlorës, vijon ende, pasi gjatë kontrolleve janë evidentuar edhe disa sende të tjera të kundërligjshme, të cilat do të jenë pjesë e hetimit.
Arrestimi i Pepnikës vjen në kuadër të dosjes së bujshme të call centerave, që dyshohet se kanë mashtruar qindra qytetarë europianë, duke shkaktuar një dëm financiar që llogaritet në mbi 50 milionë euro.
Sipas dosjes hetimore, skema funksiononte përmes call centerave të organizuar në mënyrë profesionale, ku operatorët komunikonin në gjermanisht, italisht dhe anglisht me qytetarë europianë, duke u prezantuar si këshilltarë financiarë ose përfaqësues të platformave të investimit.
Hetuesit dyshojnë se viktimat josheshin përmes platformave të rreme online, ku u premtoheshin fitime të mëdha nga investimet në bursë, kriptovaluta apo tregje financiare. Në shumë raste përdoreshin identitete të rreme, pseudonime dhe profile të fabrikuara për të fituar besimin e personave që kontaktoheshin.