Një 32-vjeçar është vënë në pranga në Vlorë, pasi qarkullonte me një automjet tip “Audi” duke mbajtur me vete një armë zjarri pistoletë, 40 fishekë luftarakë dhe një radio të ngjashme me ato që përdor Policia e Shtetit.
Operacioni policor i koduar “Siguria” u finalizua nga shërbimet e Drejtorisë Vendore të Policisë Vlorë, në kuadër të masave për rritjen e parametrave të sigurisë dhe parandalimin e ngjarjeve kriminale. Policia kishte siguruar më herët informacione operative se një shtetas qarkullonte i armatosur në qytet.
Si rezultat i ndërhyrjes në lagjen “Lef Sallata”, u bë i mundur kapja në flagrancë dhe arrestimi i shtetasit E. M., 32 vjeç, banues në fshatin Peshkëpi.
Gjatë kontrollit në automjetin e tij tip “Audi”, u sekuestruan si prova materiale një armë zjarri pistoletë, dy krehra me 22 fishekë luftarakë, një mbajtëse plastike me 18 fishekë luftarakë, si dhe një radio e ngjashme me ato të Policisë së Shtetit.
Materialet procedurale i janë referuar Prokurorisë për veprime të mëtejshme, për veprat penale “Prodhimi dhe mbajtja pa leje e armëve luftarake dhe e municionit” dhe “Mbajtja pa të drejtë e uniformës”.