Ministri i Punëve të Brendshme, Besfort Lamallari, u ka bërë thirrje qytetarëve të tregojnë kujdes dhe përgjegjësi maksimale për parandalimin e zjarreve, duke theksuar se çdo zjarr i shkaktuar nga dora e njeriut rrezikon jetën e qytetarëve, pronën, pyjet dhe pasuritë natyrore, ndërsa përbën një vepër penale që ndëshkohet me masa të ashpra.
Përmes një postimi në rrjetet sociale, Lamallari nënvizoi se mbrojtja e vendit nga zjarret është një përgjegjësi e përbashkët dhe se toleranca ndaj zjarrvënësve do të jetë zero.
“Kujdes! Zjarrvënia nuk është pakujdesi, por krim që ndëshkohet me burgim. Çdo zjarr i shkaktuar nga dora e njeriut është një kërcënim për jetën, pronën, pyjet dhe të mirën e përbashkët. Kërkohet më shumë përgjegjësi qytetare dhe gatishmëri për të mbrojtur çdo qytetar dhe shmangur katastrofa,” u shpreh ministri.
Ai rikujtoi se ndryshimet më të fundit në Kodin Penal kanë ashpërsuar ndjeshëm masat ndëshkuese për zjarrvënien, në varësi të rrethanave dhe pasojave të veprës penale.
Sipas legjislacionit në fuqi, zjarrvënia e qëllimshme dënohet me burgim nga 5 deri në 8 vjet kur kryhet gjatë stinës së nxehtë, në kushte që favorizojnë përhapjen e flakëve ose pranë zonave të banuara. Dënimi shkon nga 4 deri në 10 vjet burg kur zjarri prek zona të mbrojtura, objekte të trashëgimisë kulturore, objekte kulti, monumente kulture ose infrastrukturë kritike. Ndërsa në rastet kur zjarrvënia bëhet me qëllim ndryshimin e kategorisë ose destinacionit të tokës, parashikohet dënim nga 7 deri në 15 vjet burg.
Në mesazhin e tij, ministri theksoi se çdo zjarr ka pasoja të rënda njerëzore, ekonomike dhe mjedisore.
“Një pakujdesi ose një veprim i qëllimshëm mobilizon qindra njerëz, dhjetëra mjete dhe helikopterë për të mbrojtur jetën, banesat dhe natyrën. Çdo zjarr lë pas humbje për natyrën, komunitetin dhe brezat që vijnë. Mbrojtja e Shqipërisë nga zjarret fillon me përgjegjësinë e secilit prej nesh,” përfundoi ministri i Punëve të Brendshme.