Kryeministri Edi Rama, gjatë një bashkëbisedimi me të rinjtë në Jalë, u ndal te procesi i integrimit europian, duke iu përgjigjur pyetjeve nëse anëtarësimi i Shqipërisë në Bashkimin Europian është një objektiv real apo thjesht një premtim politik.
Rama theksoi se rruga drejt BE-së është një proces i gjatë dhe kompleks, që nuk varet vetëm nga përmbushja e kritereve teknike, por edhe nga vendimmarrja politike e vendeve anëtare. Sipas tij, Shqipëria ka shënuar progres të rëndësishëm në negociata dhe po avancon me hapjen dhe mbylljen e kapitujve të anëtarësimit.
Kreu i qeverisë shpjegoi se një nga sfidat kryesore mbetet përafrimi i legjislacionit shqiptar me atë të Bashkimit Europian, proces që kërkon miratimin e mijëra akteve ligjore dhe nënligjore. Për këtë arsye, sipas tij, qeveria ka vënë në përdorim inteligjencën artificiale për të përshpejtuar punën.
“Kroacisë iu deshën shtatë vite vetëm për këtë fazë. Ne krijuam modelin e inteligjencës artificiale ‘Diella’ dhe sot transpozimi bëhet shumë më shpejt, me një saktësi prej 99.5 për qind, ndërsa juristët ndërhyjnë vetëm për korrigjimet e fundit”, u shpreh Rama.
Ai theksoi se miratimi i legjislacionit është vetëm një pjesë e procesit të integrimit, pasi zbatimi i tij monitorohet vazhdimisht nga institucionet europiane. Sipas Ramës, çdo hap drejt anëtarësimit kërkon miratimin unanim të të 27 vendeve anëtare të BE-së.
Kryeministri kujtoi se Shqipërisë i është refuzuar tri herë hapja e negociatave, pavarësisht rekomandimeve pozitive të Komisionit Europian, duke argumentuar se procesi i integrimit ndikohet shpesh edhe nga dinamikat politike brenda Bashkimit Europian.
Në fjalën e tij, Rama u ndal edhe te marrëdhëniet me Holandën, një nga vendet që tradicionalisht ka shfaqur skepticizëm ndaj zgjerimit të BE-së. Ai tha se organizimi në Tiranë i finales së UEFA Europa Conference League ndikoi pozitivisht në perceptimin e qytetarëve holandezë për Shqipërinë.
“E panë nga afër se Shqipëria nuk ishte vendi i stereotipeve për krimin dhe drogën, por një vend krejt ndryshe nga ai që kishin krijuar në imagjinatën e tyre”, deklaroi Rama.