E ardhmja e Mohamed Salah vazhdon të mbetet një nga temat më të nxehta të merkatos verore. Sipas raportimeve të mediave turke dhe franceze, sulmuesi egjiptian është në bisedime me Beşiktaşin, ndërsa tifozët e klubit të Stambollit kanë shpërthyer në entuziazëm pas lajmeve të fundit.
Sipas këtyre raportimeve, drejtuesit e Beşiktaşit i kanë paraqitur një ofertë zyrtare 34-vjeçarit. Fillimisht Salah thuhet se kishte kërkuar një pagë prej rreth 15 milionë eurosh në sezon, por më pas ka ulur pretendimet financiare për të lehtësuar negociatat. Madje, raportohet se avokati i tij ndodhet në Stamboll për të vijuar diskutimet.
Megjithatë, deri në këtë moment nuk ka një marrëveshje të konfirmuar. Përkundrazi, agjenti i futbollistit, Ramy Abbas, ka hedhur poshtë zërat për një akord të arritur, duke lënë të kuptohet se e ardhmja e Salah mbetet ende e hapur.
Pas largimit nga Liverpooli, Mohamed Salah është lidhur me disa destinacione, përfshirë klubet e Arabisë Saudite, MLS dhe skuadra të tjera europiane. Megjithatë, sipas raportimeve të fundit, lojtari preferon të vijojë karrierën në Europë, çka e mban Beşiktaşin mes pretendentëve për firmën e tij.
Për momentin, nuk ka asnjë njoftim zyrtar nga klubi turk apo nga vetë futbollisti, ndërsa pritet që ditët në vijim të sjellin zhvillime të reja mbi një nga transferimet më të përfolura të kësaj vere.
