Pak para nisjes së seancës plenare të parashikuar për në orën 12:00, dhjetëra protestues janë mbledhur para Kuvendit, duke vijuar protestën e paralajmëruar disa ditë më parë.
Protestuesit janë pozicionuar në pjesën e pasme të godinës së Kuvendit, ndërsa kanë brohoritur “Parlament i krimit”, në momentin kur deputetët dhe ministrat socialistë kanë nisur të mbërrijnë në institucion.
Në duart e disa protestuesve janë parë vezë, mbi të cilat kanë shkruar emrat e deputetëve, si edhe kollare, që synojnë t’ua dorëzojnë përfaqësuesve të mazhorancës.
Sipas organizatorëve, këtë herë protesta do të zhvillohet me një qasje ndryshe. Ata janë shprehur se nuk do t’i godasin deputetët me vezë, por do t’ua dorëzojnë në dorë, duke u lënë atyre zgjedhjen nëse do t’i thyejnë ose jo.
Në kor ata dëgjohen duke brohoritur “Rama jepe dorëheqjen”, ndërsa më pas ka ndërhyrë policia duke i zhvendosur nga oborri i jashtëm i Kuvendit. Po ashtu policia ka marrë masa duke bllokuar zonën përreth për të shmangur incidente.