Pas stuhisë së fortë që përfshiu vendin mbrëmjen e së martës, moti pritet të përmirësohet përkohësisht gjatë ditës së sotme dhe nesër, por reshjet me shtrëngata do të rikthehen sërish të premten.
Paralajmërimi u dha nga specialistja e Institutit të Gjeoshkencave (IGJEUM), Anira Gjoni, e cila bëri të ditur se episodet me stuhi do të vijojnë deri në fund të javës.
Sipas saj, fundjava pritet të jetë më e qetë, ndërsa gjatë së enjtes dhe të premtes temperaturat do të pësojnë rënie graduale.
“Do jetë prezente deri në fund të javës. Episode si ai i mbrëmjes së djeshme pritet të kemi sërish të premten pothuajse në të gjithë territorin. Reshjet do jenë të shoqëruara me shkarkesa elektrike. Të premten do të nisin në veri shtrëngatat, pastaj do zbresin në qendër dhe do zhvendosen më pas në pjesën juglindore.
Sot dhe nesër kemi një përmirësim afatshkurtër të motit dhe priten të rikthehen reshjet të premten në formën e shtrëngatës. Fundjava do të jetë më e qetë. Të enjten dhe të premten pritet rënie graduale e temperaturave”, u shpreh Gjoni.
Duke folur për javën e ardhshme, specialistja e IGJEUM tha se e hëna mund të shoqërohet me reshje të dobëta lokale, ndërsa temperaturat do të rikthehen gradualisht në rritje.
“E hëna do të shoqërohet me reshje të dobëta lokale, ndërsa temperaturat do të rriten gradualisht. Më pas do t’i rikthehemi ditëve tipike të nxehta të verës”, theksoi ajo.