Një ngjarje e rëndë me një viktimë dhe një të plagosur ka tronditur mëngjesin e kësaj të premteje fshatin Vidhisht, në Roskovec.
Sipas të dhënave paraprake, një 35-vjeçar dyshohet se ka vrarë me armë gjahu ish-vjehrrin e tij, 58 vjeç, ndërsa ka plagosur ish-vjehrrën, e cila ndodhet në spital nën kujdesin e mjekëve.
Pas ngjarjes, autori i dyshuar është larguar nga vendi i krimit me automjet, duke marrë me vete ish-bashkëshorten, ndërsa dyshohet se e ka marrë peng. Ai është larguar edhe me armën e gjahut që dyshohet se u përdor në krim.
Ndërkohë, vëllai i viktimës ka rrëfyer se autori kishte kohë që kërcënonte familjen dhe se krimi, sipas tij, ishte i paralajmëruar.
“Dëgjuam një zhurmë, që bërtisnin brenda. Ai thoshte: ‘Hajdeni se do t’ju vras të gjithëve.’ Pastaj njoftuam policinë dhe ajo erdhi. Ai ishte i armatosur. Doli nga mbrapa shtëpisë, nga dritarja. Kishte lënë makinën. Mori edhe vajzën dhe iku.
Është arrestuar tri herë dhe më pas ka dalë. Vajti në Tiranë për armë, e futën brenda dhe e nxorën pas një muaji. Këtu ishte në arrest shtëpie, sepse kërcënonte. I thoshte vajzës: ‘Ti nuk e bën jetën pa mua. Unë do t’ju vras të gjithëve.’ Vrasja ishte e paramenduar. Kur vajta brenda, i gjeta të dy të shtrirë”, u shpreh ai.
Policia vijon kërkimet për kapjen e autorit të dyshuar, ndërsa hetimet po vazhdojnë për zbardhjen e plotë të rrethanave të ngjarjes.