Politika ka nisur punën për hartimin e rregullave të reja të lojës për zgjedhjet, ndërsa Komisioneri Shtetëror i Zgjedhjeve, Ilirjan Celibashi, kërkon që Kodi i ri Zgjedhor të vendosë kufij të qartë për të parandaluar përdorimin e burimeve shtetërore për qëllime elektorale.
“Kodi duhet të parashikojë shprehimisht parimin e ndarjes ndërmjet shtetit dhe partisë në pushtet, si një standard i administrimit zgjedhor dhe jo si një parim politik. Në shumë vende të OSBE-së, ky është një parim me vlerë kushtetuese ose ligjore. Ka nevojë për një filozofi të re rregullatore. Kjo filozofi duhet të mbështetet në tre parime themelore. Ligji duhet të jetë i qartë. Kompetencat mbikëqyrëse duhet të jenë efektive dhe, përgjegjësia duhet të jetë reale dhe proporcionale”, tha Komisioneri Celibashi.
Sipas tij, ndryshimet në Kodin Zgjedhor duhet të garantojnë një ndarje të qartë mes shtetit dhe partisë në pushtet, duke forcuar standardet e administrimit të zgjedhjeve dhe mekanizmat e mbikëqyrjes.
Nga ana tjetër, për mazhorancën, vendosja e një ekuilibri mes funksionimit të institucioneve shtetërore dhe aktivitetit politik të partisë në pushtet mbetet një sfidë, por jo e pamundur.