Shërbimet e Drejtorisë Vendore për Kufirin dhe Migracionin Korçë kanë finalizuar operacionin e koduar “Route”, në kuadër të kontrolleve intensive për parandalimin dhe goditjen e rasteve të dhënies së ndihmës emigrantëve për kalim të paligjshëm të kufirit.
Operacioni u organizua bazuar edhe në informacionet e siguruara në rrugë operative, ndërsa në përfundim të tij u arrestuan shtetasit J. M., alias D. M., 42 vjeç, banues në Korçë, dhe E. D., 31 vjeç, banues në fshatin Belorta, Maliq.
Nga verifikimet e kryera rezultoi se shtetasi E. D. ishte me masën e sigurisë “Arrest në shtëpi”.
Dy të arrestuarit u kapën në flagrancë nga shërbimet e Policisë Kufitare në fshatin Plasë, në Maliq, ku kishin grumbulluar rreth 28 shtetas sudanezë.
Sipas Policisë, emigrantët më pas transportoheshin me mjete të ndryshme, në grupe prej 7-8 personash, në drejtim të veriut të Shqipërisë. Ata dyshohet se synonin të kalonin në mënyrë të paligjshme në territorin e Malit të Zi.
Në përfundim të veprimeve, materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.