Ministri i Turizmit, Kulturës dhe Sportit, Blendi Gonxhja, ka publikuar të dhënat për administrimin e plazheve gjatë vitit 2026, duke theksuar rritjen e hapësirave publike në dispozicion të qytetarëve dhe pushuesve.
Sipas Gonxhes, këtë vit janë 1,689 parcela ose stacione plazhi me funksion dhe administrim publik, nga 1,014 që ishin në vitin 2025.
Kjo përfaqëson një rritje prej 67%, ose 675 parcela më shumë krahasuar me një vit më parë.
Edhe sipërfaqja totale e plazheve publike është zgjeruar. Në vitin 2026 ajo ka arritur në 3.18 milionë metra katrorë, nga 2.88 milionë metra katrorë në vitin 2025.
Sipas të dhënave, bëhet fjalë për rreth 303 mijë metra katrorë hapësirë publike shtesë, ose një rritje prej 10.5%.
Një tjetër risi e sezonit turistik 2026 është administrimi i 124 parcelave nga bashkitë, një kategori e re shërbimi e zyrtarizuar gjatë këtij viti.