Një 25-vjeçar nga Florida përfundoi në duart e autoriteteve pasi i tregoi ChatGPT-së se planifikonte të vriste ish-të dashurën. OpenAI njoftoi FBI-në, e cila më pas ia referoi rastin autoriteteve lokale.
Sipas hetuesve, Darren Zhou, ish-analist në një bankë, iu drejtua ChatGPT-së në mars, pasi ishte ndarë nga e dashura me të cilën kishte qenë në lidhje për gjashtë muaj. Fillimisht ai foli për ndarjen, xhelozinë ndaj burrave që e rrethonin ish-partneren dhe dëshirën për t’u rikthyer me të.
Me kalimin e bisedave, mesazhet morën një tjetër drejtim. Sipas autoriteteve, Zhou përshkroi plane për përdhunimin dhe vrasjen e ish-të dashurës, si edhe për vetëvrasje pas krimit. Kërcënimet e tij u zgjeruan edhe ndaj familjes së 21-vjeçares.
OpenAI lejon shqyrtimin e bisedave nga punonjësit dhe njoftimin e autoriteteve kur konstatohet një rrezik serioz për persona të tjerë. Në maj, FBI-ja ia përcolli bisedat Zyrës së Sherifit të Qarkut Palm Beach. Një efektiv që i analizoi ato arriti në përfundimin se mesazhet nuk ishin shpërthime të paqarta emocionale, por tregonin një model planifikimi.
Ish-e dashura deklaroi se ishte ndarë prej tij për shkak të sjelljes së tij të çrregullt, xheloze dhe kontrolluese. Sipas policisë, pas ndarjes Zhou e përndoqi me telefonata, mesazhe dhe komunikime kërcënuese në rrjetet sociale.
Ai u arrestua në maj dhe u lirua dy ditë më vonë kundrejt një garancie prej 100 mijë dollarësh. Prokuroria e akuzoi për përndjekje të rëndë, kërcënime me shkrim për vrasje dhe përdorim të paligjshëm të telefonit celular.
Më 13 gusht, Zhou u deklarua fajtor për të tria akuzat dhe arriti një marrëveshje me prokurorinë që i shmangu burgimin. Gjykata e dënoi me tetë vjet shërbim prove dhe vendosi ndaj tij një sërë kufizimesh.