Një histori të pazakontë me tortën e ditëlindjes së vogëlushes së tij, Ajër!
Erion Isai ishte sot i ftuar në “Jo Vetëm Modë”, ku rrëfeu për kandidaturën në Bashkinë Kolonjë dhe sesi është pritur nga familja e tij. E ndërsa flisnin për vajzën 3 vjeçe Ajër, Erioni dhe bashkëshortja Ajlin kujtuan një moment të pazakontë gjatë ditëlindjes së saj të dytë.
I pyetur nga Orinda Huta nëse u pëlqen t’ia festojnë çdo ditëlindje, Erioni u përgjigj se bashkëshortja është më e dhënë për këtë pjesë.
“Kur Ajër mbushi 2 vjeç, Ajlin kishte marrë një tortë aq të madhe, sa për 70 veta”, tregoi Erioni, “Nuk e mbaja dot.”
Torta kishte qenë me kate dhe gjatë festës në shtëpi kishin ngrënë katet e sipërm dhe të fundit, e kishin lënë për ta vazhduar festën tek shtëpia e vjehrrit dhe vjehrrës. Dhe ja ku doli surpriza:
“Filloj të pres tortën, kur fus thikën ajo bën: “grrrrr” dhe fluturuan bukëpeshk. Kati i poshtëm kishte qenë bukëpeshk, vetëm pjesën e jashtme e kishte si tortë”, tregoi Erioni duke u shkrirë së qeshuri.
Erion Isai rrëfeu se vjehrrit e tij janë demokratë, për shkak se gjatë komunizmit, vjehrri ka qenë i internuar për vite të tëra.
“Hyra në një çerdhe demokratësh”, tregoi kandidati i Partisë Socialiste për Bashkinë Kolonjë, “Vjehrrën s’e bëra dot socialiste, ama votën ia mora.”