Këshilltarët e majtë kanë braktisur mbledhjen e Këshillit Bashkiak në Maliq, e cila ishte thirrur jashtë radhe për të diskutuar mbi Reformën Territoriale.
Mbledhja zgjati rreth 20 minuta, ndërsa në rendin e ditës ishte parashikuar miratimi i qëndrimit zyrtar të Këshillit Bashkiak të Maliqit, për t’ia përcjellë Kuvendit të Shqipërisë në kuadër të procesit të rishikimit të ndarjes administrativo-territoriale.
Mbledhja ishte njoftuar të zhvillohej rreth orës 10:00. Megjithatë, pas deklaratës së grupit të këshilltarëve të majtë se nuk do të shpreheshin me vendimmarrje lidhur me propozimin që duhet t’i dërgohet Parlamentit, kryetari i Këshillit Bashkiak deklaroi mbylljen e mbledhjes.
Vendimi shkaktoi reagime nga këshilltarët e opozitës dhe qytetarët e pranishëm.
Pamjet tregojnë momentin kur këshilltarët e majtë largohen nga salla brenda pak sekondash, ndërsa pjesa tjetër e opozitës vijoi me deklaratat.
Situata u tensionua më tej kur një i moshuar hyri në ambientet e sallës me shkop në dorë, duke kundërshtuar mbylljen e mbledhjes dhe duke debatuar me kryetarin e Këshillit Bashkiak.