Kreu i Partisë Demokratike, Sali Berisha, ka kundërshtuar projektin për krijimin e një shteti sovran bektashi në Tiranë, duke e cilësuar nismën si “antikushtetuese” dhe “antikombëtare”.
Në një deklaratë për mediat, Berisha tha se Partia Demokratike e ka kundërshtuar këtë projekt që prej vitit 2024. Sipas tij, krijimi i një shteti bektashi bie ndesh me Kushtetutën dhe karakterin laik të Shqipërisë.
“PD ka reaguar fuqimisht. Cilido që është i interesuar për reagimet e PD-së, i sugjeroj t’u referohet deklaratave të mia. Kam qenë në arrest shtëpie kur unë kam ngritur zërin kundër tij dhe duhet të ketë qenë janari i vitit 2024”, deklaroi Berisha.
Berisha e cilësoi projektin edhe si “kundër bektashizmit shqiptar”, duke vlerësuar rolin historik të këtij komuniteti në çështjen kombëtare shqiptare.
“Ky është një akt në radhë të parë kundër bektashizmit shqiptar, i cili ka qenë dhe është një shtyllë e vërtetë e atdhetarisë”, u shpreh kreu i PD-së.
Sipas Berishës, krijimi i një entiteti të tillë mund të ndikojë në bashkëjetesën fetare dhe të nxisë përçarje në shoqërinë shqiptare.
“Kjo aventurë, e cila, siç kemi deklaruar më parë, vjen në kundërshtim të hapur me Kushtetutën e Shqipërisë, vjen në kundërshtim të hapur me karakterin laik të shtetit shqiptar që nga themelimi i tij gjer sot, përpiqet të nxisë përçarje fetare në një vend ku toleranca dhe bashkëpunimi fetar është gjëja më madhështore në shpirtin e atij populli”, tha Berisha.