Mbytja e një 7-vjeçareje në lumin Drin dhe situata e rënduar nga zjarret në Vajkal kanë detyruar Bashkinë e Bulqizës të shtyjë aktivitetet e parashikuara për ditët në vijim.
Zjarri që ka përfshirë zonën e Vajkalit ka nisur një ditë më parë, ndërsa pasditen e sotme, sipas specialistëve, situata është përkeqësuar dhe flakët kanë dalë jashtë kontrollit.
Për shkak të terrenit tejet të vështirë, ndërhyrja nga toka është e vështirë, ndaj Emergjencat Civile kanë kërkuar mbështetjen e strukturave shtetërore për ndërhyrje nga ajri, me qëllim vënien nën kontroll të vatrës së zjarrit.
Në të njëjtën kohë, Bulqiza është përballur me një tjetër ngjarje tragjike. Një natë më parë, një familje prej pesë anëtarësh u bllokua në lumin Drin. Rritja e prurjeve, pas hapjes së digës së HEC-it të Spilesë në Maqedoninë e Veriut, e rëndoi situatën.
Pavarësisht ndërhyrjes së autoriteteve lokale, një vajzë 7-vjeçare u rrëmbye nga rrjedha e ujit dhe humbi jetën.
Në këto rrethana të vështira, Bashkia e Bulqizës ka vendosur të shtyjë aktivitetet e planifikuara.
“Aktualisht jemi ende në tensionin dhe angazhimin e vazhdueshëm për menaxhimin e situatës së zjarreve në territor, ndërsa ngjarja e rëndë në Drinin e Zi na ka prekur të gjithëve dhe, mbi të gjitha, ka lënë një familje në një dhimbje të jashtëzakonshme. Në këto rrethana, menduam se sot nuk është momenti për të festuar. Me mirëkuptimin e plotë të artistëve të ftuar, të cilët i falënderojmë, kemi vendosur që aktiviteti të shtyhet për një moment më të përshtatshëm”, njofton kryetarja e Bashkisë së Bulqizës, Festime Mjeshtri.
