FSHF ka publikuar vendimet e Komisionit të Disiplinës dhe Etikës. Alban Xhaferi është pezulluar me 15 sfida pas grushtit ndaj asistentit Ergys Spahiu. Sa i përket trajnerit Edi Martini është një dënim prej 6 ndeshjesh. Në anën tjetër Elbasani gjobitet me 1 milion lekë të vjetra për organizim jo të mirë ndaj Vllaznisë.
Për Elis Dervishajn nga Vllaznia është vendosur katër ndeshje pezullim. Sfida u luajt më 29 gusht në Elbasan dhe ku nuk lejoheshin tifozët. Vllaznisë iu anuluan dy gola pas rishikimit me VAR për pozicion jashtë loje.
Tensioni i dy golave të anuluar në minutat e fundit solli përplasjen e presidentit të Vllaznisë dhe trajnerit Martini me zyrtarët e sfidës. Pikërisht pas përfundimit të sfidës erdhi grushti ndaj Spahiut.
Vllaznia u ankua për organizimin e klubit verdheblu. Në anën tjetër presidenti Xhaferi kërkoi ndjesë për goditjen ndaj asistentit të gjyqtarit Dorjan Maletaj.