Humoristi Florjan Binaj ka folur për angazhimin e tij politik dhe mundësinë e kandidimit në zgjedhjet e ardhshme, gjatë një interviste këtë të shtunë në Euronews Albania.
Edhe pse disa muaj më parë opozita u bashkua rreth emrit të Binajt si kandidat i mundshëm për Bashkinë e Tiranës, duket se situata ka ndryshuar dhe ai nuk gëzon më të njëjtën mbështetje nga Sali Berisha dhe Partia Demokratike.
I pyetur nëse, në skenarin më të keq, do të garojë si kandidat i pavarur dhe do ta zhvillojë i vetëm betejën elektorale, ndërsa në skenarin më të mirë do të jetë pjesë e një fronti të bashkuar opozitar, Binaj u përgjigj shkurt: “Po”.
Gazetarja këmbënguli për të kuptuar se mbi çfarë mbështetet kjo bindje dhe çfarë e shtyn të mendojë për një angazhim të tillë politik.
Binaj u shpreh se vendimi lidhet me bindjen e tij se kushdo që beson se mund të japë një kontribut për përmirësimin e shoqërisë duhet ta bëjë këtë.
“Ku hahet më çon që mendoj që kjo është gjëja e duhur që duhet të bëj, jo vetëm unë, por kushdo që ka një kontribut në shoqëri”, u shpreh ai.
Më tej, Binaj e bëri të qartë se kandidimi i tij për Bashkinë e Tiranës nuk do të kushtëzohet nga mbështetja e opozitës, duke deklaruar se do të jetë një nga kandidatët për drejtimin e kryeqytetit, pavarësisht nëse do të garojë nën siglën e një force politike apo si kandidat i pavarur.