TIRANË– Nga sot nis bojkoti pa afat i avokatëve ndaj gjyqeve që do të zhvillohen në Gjykatën e Posaçme. Vendimi u mor një ditë më parë nga Këshilli i Përgjithshëm i Dhomës së Avokatisë, të cilët kundërshtojnë rregulloren e re të GJKKO-së, sipas së cilës avokatëve nuk u lejohet celulari në sallën e gjyqit. Bojkoti do të vijojë deri në pezullimin e rregullores, ndërsa përjashtim do të bëjnë seancat për masat e sigurisë për të mos penalizuar personat e arrestuar të cilët duhen të dalin para togave të zeza për vlerësimin e arrestit.
Avokatët e argumentuan vendimin me kufizimet që rregullorja vendos gjatë ushtrimit të profesionit, mes tyre ndalimin e mbajtjes së celularëve në ambientet e gjykatës. Sipas tyre, disa prej dispozitave bien ndesh me ligjin dhe Kushtetutën dhe krijojnë pengesa edhe për përdorimin e mjeteve të punës gjatë proceseve gjyqësore.
Dhoma e Avokatisë kishte kërkuar më herët rishikimin e rregullores, por GJKKO nuk i ka kthyer përgjigje kërkesës. Për të gjithë avokatët që nuk zbatojnë vendimin për bojkot, parashikohen masa disiplinore deri në heqjen e kërkesës.
Gjykata e Posaçme e Shkallës së Parë për Korrupsionin dhe Krimin e Organizuar ka miratuar një rregullore të re, e cila përcakton një sërë rregullash për hyrjen në godinë, ndjekjen e seancave gjyqësore dhe aktivitetin e medias të cilëve u ndalohet mbajtja e celularit.
Edhe mediat, si dhe organizatat ndërkombëtare të gazetarëve, kanë kundërshtuar rregulloren, duke argumentuar se ajo censuron punën dhe cenon të drejtën e informimit. Ndërkohë, gazetarët që mbulojnë GJKKO-në kanë refuzuar akreditimin për të ndjekur seancat.