Ambasadori i Rusisë në Shtetet e Bashkuara, Alexander Darchiev, ka ndërruar jetë papritur në moshën 66-vjeçare. Lajmi u bë i ditur të mërkurën nga Ministria e Jashtme ruse, e cila nuk dha detaje mbi shkakun e vdekjes.
Në një deklaratë zyrtare, diplomacia ruse e përshkroi Darchievin si një profesionist të jashtëzakonshëm, që kishte shërbyer në një prej fushave më të vështira të politikës së jashtme të Rusisë.
“Alexander Darchiev shërbeu në një nga sektorët më sfidues të politikës së jashtme ruse”, thuhej në deklaratë, ku Ministria e Jashtme shprehu gjithashtu ngushëllimet për familjen dhe të afërmit e tij.
Darchiev ishte një diplomat me përvojë, i njohur për kritikat e ashpra ndaj Perëndimit. Ai mori detyrën e ambasadorit rus në Uashington në mars të vitit 2025.
Mandati i tij përkoi me një periudhë ndryshimesh në marrëdhëniet mes SHBA-së dhe Rusisë, pasi presidenti amerikan Donald Trump nisi bisedimet dypalëshe me Moskën dhe reduktoi ndihmën amerikane për Ukrainën.
Përpara emërimit në Uashington, Darchiev kishte drejtuar Departamentin e Amerikës së Veriut në Ministrinë e Jashtme ruse. Gjithashtu, ai kishte shërbyer si ambasador i Rusisë në Kanada nga viti 2014 deri në vitin 2021.