Shërbimi sekret izraelit Mossad ka informuar CIA-n mbi kërcënime të mundshme dhe konkrete nga Irani ndaj presidentit amerikan Donald Trump dhe figurave të tjera të rëndësishme të administratës së tij. Sipas raportimeve të gazetës izraelite Israel Hayom, inteligjenca izraelite ka ngritur shqetësimin se Teherani mund të përdorë edhe dronë të pajisur me eksploziv për të goditur objektiva amerikane, një formë sulmi që paraqet vështirësi të veçanta për strukturat tradicionale të sigurisë.
Nga ana e tij, një zyrtar i lartë amerikan ka konfirmuar se autoritetet në Uashington kanë qenë të informuara për rrezikun që vjen nga kërcënimet iraniane ndaj drejtuesve të administratës. Shqetësimet janë shtuar veçanërisht pas eliminimit të liderit suprem iranian, Ali Khamenei, gjatë fazës së parë të operacionit të përbashkët ushtarak mes Izraelit dhe Shteteve të Bashkuara. Megjithatë, informacionet e fundit të transmetuara nga pala izraelite flasin për rreziqe më të drejtpërdrejta dhe më specifike.
Përballë kësaj situate, administrata amerikane ka ndërmarrë një sërë masash të jashtëzakonshme për mbrojtjen e zyrtarëve që konsiderohen objektiva të mundshëm. Daljet e tyre në publik, sidomos në ambiente të hapura, janë kufizuar, ndërsa disa prej drejtuesve të lartë kanë lënë përkohësisht banesat private për t’u akomoduar në struktura me siguri të shtuar.
Në mesin e personave që janë zhvendosur ndodhet edhe sekretari i Thesarit, Scott Bessent. Për shkak të rolit të tij në administrimin e sanksioneve ekonomike kundër Iranit, ai konsiderohet një prej figurave kyçe të presionit financiar amerikan ndaj Teheranit. Bessent është larguar nga rezidenca e tij në Georgetown, në Uashington, dhe është vendosur në një bazë ushtarake të mbrojtur.
Masa të ngjashme janë aplikuar edhe për sekretarin amerikan të Shtetit, Marco Rubio, i cili njihet për qëndrimin e ashpër ndaj regjimit iranian dhe kundërshtimin e një marrëveshjeje me të. Edhe sekretari i Mbrojtjes, Pete Hegseth, po qëndron në një ambient ushtarak të sigurisë së lartë. Këto lëvizje janë pjesë e një plani më të gjerë për të garantuar mbrojtjen e ekipit që drejton sigurinë kombëtare amerikane.
Vëmendje e veçantë i është kushtuar edhe sigurisë së presidentit Trump. Gjatë aktiviteteve të tij publike, përfshirë ato në kuadër të fushatës për zgjedhjet e mesit të mandatit, janë vendosur kufizime të forta. Organizimi i tubimeve në ambiente të hapura është reduktuar ndjeshëm, ndërsa në rastet kur ato zhvillohen, siguria plotësohet me pajisje dhe sisteme të posaçme për zbulimin dhe neutralizimin e dronëve.
Sipas burimeve të larta amerikane, kërcënimet ndaj drejtuesve të administratës janë bërë një faktor i rëndësishëm në qëndrimin gjithnjë e më të rezervuar të Trumpit për mundësinë e arritjes së një marrëveshjeje me Iranin. Negociatat, të mbështetura fillimisht në një memorandum mirëkuptimi të arritur në maj, janë përballur me pengesa gjithnjë e më të mëdha.
Pavarësisht disa sinjaleve të fleksibilitetit nga Teherani në lidhje me programin bërthamor, pala iraniane nuk pranon të hyjë në bisedime të mirëfillta pa kërkuar më parë heqjen e bllokadës detare dhe lehtësimin e një pjese të konsiderueshme të sanksioneve amerikane. Një tjetër kërkesë e Iranit është zhbllokimi i aseteve të tij financiare të ngrira jashtë vendit.
Në këtë klimë tensioni, Trump ka vendosur të largojë zëvendëspresidentin JD Vance nga angazhimi i drejtpërdrejtë në negociatat me Iranin. Vance kishte qenë ndër mbështetësit e një zgjidhjeje diplomatike, por presidenti i ka caktuar një tjetër prioritet politik në nivelin e brendshëm.
Në një reagim publik të enjten, Trump bëri të ditur se i kishte kërkuar zëvendëspresidentit të përqendronte “të gjithë vëmendjen” te ajo që ai e përshkroi si korrupsion dhe kriminalitet në qytetet dhe shtetet e administruara nga demokratët.
Duke komentuar mundësinë e një marrëveshjeje me Teheranin, presidenti amerikan mbajti një qëndrim të prerë.
“Ne nuk kemi nevojë për një marrëveshje me Iranin. Ato ditë kanë kaluar prej kohësh. Ne kemi paratë e tyre, qindra miliarda dollarë, dhe kemi Ngushticën e tyre!”, deklaroi Trump, duke iu referuar Ngushticës së Hormuzit.
Ai argumentoi gjithashtu se angazhimi i Vance-it në luftën kundër korrupsionit në shtetet e drejtuara nga demokratët mund t’i sillte buxhetit amerikan kursime më të mëdha sesa një marrëveshje e mundshme me Iranin.
Ky qëndrim u bë publik vetëm një ditë pasi mediat raportuan se JD Vance kishte tentuar të organizonte një takim të drejtpërdrejtë me përfaqësues të lartë iranianë, me synimin për të gjetur një rrugëdalje diplomatike nga konflikti. Më herët, zëvendëspresidenti kishte pranuar publikisht se lufta me Iranin përbënte një nga faktorët që ndikuan në rezultatin negativ të republikanëve në zgjedhjet e mesit të mandatit.
Ndërkohë, strategjia që do të ndjekë administrata Trump në vijim mbetet ende e paqartë. Një nga skenarët që po shqyrtohet është zgjerimi i presionit ekonomik ndaj Iranit, përmes kufizimit të mëtejshëm të kanaleve të tregtisë dhe furnizimit. Në këtë drejtim, vëmendja e Uashingtonit mund të zhvendoset te pikat tokësore të kalimit kufitar, veçanërisht ato që lidhin Iranin me Irakun dhe Turqinë.
Një dilemë tjetër madhore lidhet me mundësinë e rifillimit të operacioneve ushtarake amerikane. Në tryezë mbetet skenari i ndërhyrjes për të penguar Iranin të avancojë drejt kapaciteteve të armëve bërthamore, si dhe të rindërtojë industrinë e prodhimit të raketave.
Sipas raportimeve, Teherani po përpiqet të zhvendosë një pjesë të këtyre kapaciteteve në komplekse nëntokësore, duke i bërë ato më të vështira për t’u goditur. Një vendim i Trumpit për të ndërmarrë sulme të reja mund të shënonte rikthimin e plotë të konfliktit, me pasoja potencialisht të rënda jo vetëm për Iranin, por edhe për vendet e tjera të rajonit të Gjirit.