Situatat absurde të Flamurtari shtohen dita-ditës por askund në horizont nuk shihet zgjidhja e problemeve madhore që ka klubi. Mospagesa detyrimesh që shpejt mund të shoqërohen me penalizime të rënda sportive, arrati masive nga Vlora e lojtarëve si dhe asnjë sinjal se gjërat mund të ndryshojnë. Pak a shumë kjo është situata kaotike në Vlorë ku zgjidhja që drejtuesit e klubit dhe të pushtetit vendos kanë menduar është një… kafe.
Futbollistët e Flamurtarit nuk kanë ndër mend të qëndrojnë duarkryq duke shpresuar që sezonin e ardhshëm të paguhen nga klubi i cili nuk i ka shlyer prej shumë muajsh detyrimet që ka ndaj tyre. Si rrjedhojë, pjesa më e madhe e lojtarëve janë larguar apo do të largohen drejt ekipeve të tjera të cilat kanë nuhatur se sa e lehtë është t’u rrëmbesh vlonjatëve futbollistët në këto momente.
Për më tepër, të gjithë me dokumente në duar kërkojnë që të paguhen tashmë në një mënyrë apo një tjetër nga klubi i cili i mbajti me premtime boshe gjatë gjithë vitit ku ata si profesionistë të vërtetë luftuan deri në fund dhe arritën deri aty sa në teori siguruan edhe pjesëmarrjen në Europë.
Por lëvizja e vetme që ka bërë klubi në këtë periudhë ka qenë organizimi i “një kafe mes miqsh”. Kështu, administratori Idrizi është takuar në një lokal të kryeqytetit me kryebashkiakun Leli, duke ftuar edhe figura të shquara të sportit vlonjat. Shumë diskutime si të zgjidhen çështjet që shqetësojnë klubin, por asnjë lëvizje konkrete për këto zgjidhje, ndërsa Flamurtari rrezikon seriozisht që sezonin e ardhshëm ta nisë me shumë pikë minus nga detyrimet e shumta që ka, gjithmonë nëse do të arrijë të regjistrohet në kampionat.